Oor ons

Stimuleer onder andere koördinasie en ruimtelike oriëntering.

Hierdie woord beskryf kinders se ervaring wanneer hulle met materiaal speel wat verskillende teksture bevat. Daar is geleentheid om met water, sand, modder, saagsels, gruis en soortgelyke materiale te speel. Hier kan die kinders ook met vorms wat 'n simboliese betekenis het, soos in skaak, speel. Die twee sandputte teenoor mekaar beklemtoon die verskil tussen 'n vierkant se vier hoeke en 'n driehoek se drie hoeke. Hierdie twee vorms is ook spesifiek gekies om weg te beweeg van die rondheid va...

Vanweë die kalmerende effek van water, beklemtoon terapeute wat werk met hiperaktiewe kinders en kinders met spraakgebreke die terapeutiese waarde van veral waterspel. Die waterarea gee geleentheid vir die kleuters om met hul voete in die water te plas. Dit gee ook blootstelling aan wiskunde en wetenskap konsepte.

Die Tinka-Tonka is presies wat die naam se: Iets waarop die kinders kan raas en lawaai. 'n Sterk draad of kabel word tussen twee pale gespan. Allerlei voorwerpe wat melodiese sowel as perkussieklanke voortbring wanneer die kinders daarop slaan, word aan die draad of kabel gehang. Behalwe vir die klankervaring – ouditiewe diskriminasie, kan dit ook aggressie help wegwerk.

Hierdie speelarea bestaan uit 'n set-set area asook oop spasie op gras. 'n Ander balaktiwiteit word elke dag reggesit.Leerders se hand-oog-koördinasie, hand-voet-koördinasie asook voet-oog-koördinasie word hier versterk tydens spel.

Die arena is ontwerp om te lyk soos die van antieke Griekeland. Kinders kry geleentheid om spontaan of saam met die onderwyseres stories of rympies uit te speel of sommer net konsert te hou. Verskillende rekwisiete (“props") soos maskers, fantasieklere, ens. word daagliks beskikbaar gestel. Gedurende fantasiespel kry die kinders die geleentheid om hul sosiale en emosionele vaardighede uit te oefen.

Die stadskind kry min geleentheid om, veral kaalvoet, oor rowwe terrein te loop. Verskillende voorwerpe is in die betonblad vasgesement en kleuters word aangemoedig om kaalvoet oor hierdie blad te loop en hulle ervaring te verwoord. Die area dra by tot Kinestetiese bewustheid.

Hierdie is 'n opwindende plek vir die kinders. Die reuke en verskillende gebruike van die kruie is 'n heerlike ervaring vir die kinders.

Elke klas het sy eie stukkie grond waarop hulle na hartelus kan plant. Projekte soos die plant van katoen kan aangepak word. Die leerders beleef hier ook die lewensiklusse van plante.

Hierdie area dra by tot die ontwikkeling van liggaam- en skouerontwikkeling wat nodig is vir ontluikende skryf en potloodgreep.

Hier kan kleuters na hartelus bou en "mors" en so oefen hul onbewustelik probleem oplossing en logiese denke terwyl hul verskeie konstruksies bou.

Musiek is hier beskikbaar. Serpe, linte, fantasieklere en nog vele meer word hier reggesit. Die area dra by tot die ontwikkeling van ekspressiewe taal en woordeskat uitbouing.

Kamers kan verander na gelang van tema.

Hier val die klem sterker op die estetiese. 'n Kindertuin is uitgelê met paadjies tussen die akkers en tablo's. Boekies, tydskrifte en leeskaarte word hier vir die kleuters in 'n leeshoekie reggesit. 'n Hok met budgies en wilde voëltjies, asook 'n kamp vir eende en hoenders vorm deel van hierdie area en kleuters raak betrokke by die versorging van hierdie area.

In hierdie area leer die kleuters al die vaardighede aan om 'n apparaat met wiele te kan manipuleer. Die ryvlak is so beplan dat daar afwisseling in die ryvlak is d.m.v. 'n bruggie, 'n holte en 'n pypheuwel. Verder moet daar koers gehou word om sirkels en by afdraaipaaie. Die voetbrug bring ook vernouing van die ruimte bokant die kop.

Hier word na hartelus in die sand gegrou en kastele gebou. Die area help terselfdertyd die ontwikkeling van fynmotoriese spiere wat nodig is vir ontluikende skrif.